El circuitu de cine itinerante La Cinemateca Ambulante ufierta les premiaes La novelista y su película y La emperatriz rebelde

El programa incluye una sesión especial dedicada al cine asturianu d’autor, cola proyección de Contracampos, de Ramón Lluís Bande, y Hilos, de Tito Montero, y la cinta d’animación Terra Willy: planeta desconocido

16/01/2023.- La Cinemateca Ambulante vuelve entamar con fuercia l’actividá depués del parón navidiegu y ufierta pa esti trimestre un total de 99 proyecciones en 24 conceyos asturianos. Esti trimestre participen nel ciclu los Conceyos de Cabrales, Cangues d’Onís, Cangas del Narcea, Casu, Castrillón, Colunga, Gozón, Llangréu, Ḷḷena, Llanes, Mieres, Nava, Navia, Noreña, Piloña, Ribadeva, Ribeseya, Siero, Sobrescobiu, Sotu’l Barcu, Tinéu, Valdés, A Veiga y Villaviciosa, que sumen un total de 28 sedes. Les películes emítense en versión orixinal subtitulada al español y la entrada a les proyecciones ye de baldre.

El circuitu de cine itinerante de Llaboral Cinemateca pa estos meses incluye la proyección de la película austriaca premiada La emperatriz rebelde, de Marie Kreutzer, onde Vicky Krieps da vida, de manera estraordinaria, a Sissi Emperatriz; y Entre las olas, una película estrenada va poco, escrita y dirixida por Anaïs Volpé, que cunta la historia de dos actrices moces que ven amenazada la so amistá cuando les garren pa una obra en París. El programa incluye tamién la última obra de Hong Sang-soo, el maestru del cine coreanu, La novelista y su película, un filme en blanco y negro que xira alredor de la creación artística y la lliteratura y que yá algamó premios en Berlín y Xixón.

Amás, Ramón Lluís Bande y Tito Montero ponen l’acentu asturianu al programa. Estos dos cineastes, esponentes máximos del cine asturianu d’autor, van ufiertar una sesión especial que llama a la nuestra historia, a les revueltes de la nuestra memoria, reviviéndola al traviés de les sos obres más nueves: Contracampos, de Bande, y Hilos, de Montero, que s’estrenaron pela primer vez na edición pasada del Festival Internacional de Cine de Xixón.

Como novedá, esti trimestre La Cinemateca Ambulante avérase al públicu más mozo cola película d’animación Terra Willy: planeta desconocido,que va proyectase en versión doblada al español.

La Cinemateca Ambulante ye’l ciclu de cine itinerante de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica qu’ufierta La Cinemateca Ambulante ta coordinada pol Festival Internacional de Cine de Xixón.